3.4 சூழல்கள் மற்றும் உறவுகள்
ஒரு கலைவடிவம் அதன் அமைப்பால் மட்டுமே இருப்பதில்லை. அது நிகழ்த்தப்படும் சந்தர்ப்பங்கள், அதைத் தொடர்ந்து தாங்கும் மக்கள், அதற்கு தேவையான பொருட்கள் மற்றும் இடங்கள், மேலும் அது தொடர்ந்து வாழும் சமூக, சடங்கு, பொருளாதார மற்றும் அரசியல் சூழ்நிலைகள் ஆகியவற்றிலிருந்து அதன் பொருளைப் பெறுகிறது.
ஒரே பாடல், நடனம் அல்லது நாடகத் தொடர், ஒரு சடங்கில், குடும்ப நிகழ்வில், பொது மேடையில், பள்ளியில் அல்லது குறிப்பாக கேமராவுக்காக நிகழ்த்தப்படும் போது வேறு பொருள் பெறலாம். அதன் காலநீளம், வரிசை, நிகழ்த்துநர்கள், கருவிகள், உடை, பார்வையாளர்களுடனான தொடர்பு மற்றும் அணுகல் விதிகளும் மாறலாம். எனவே சூழல் என்பது நிகழ்த்தலை விவரித்த பிறகு சேர்க்கப்படும் பின்னணித் தகவல் அல்ல. அது கலைவடிவத்தின் அறிவின் ஓர் அங்கமே ஆகும்.
கலை ஏன், எப்போது, யாருக்காக நிகழ்த்தப்படுகிறது என்று கேளுங்கள்
அந்த நடைமுறைக்கு நோக்கம் வழங்கும் சந்தர்ப்பங்களிலிருந்து தொடங்குங்கள்:
- கலை எப்போது நிகழ்த்தப்படுகிறது?
- எந்த நிகழ்வு, சடங்கு, பருவம் அல்லது சமூகத் தேவை அதை நிகழச் செய்கிறது?
- நிகழ்த்தலை யார் கோருகிறார்கள், ஆதரிக்கிறார்கள், ஒருங்கிணைக்கிறார்கள் அல்லது அனுமதிக்கிறார்கள்?
- யார் பங்கேற்க வேண்டும் என்று எதிர்பார்க்கப்படுகிறது? யார் பார்க்கலாம்?
- பங்கேற்பு அழைப்பின் பேரிலா, கட்டாயமா, கட்டுப்படுத்தப்பட்டதா அல்லது அனைவருக்கும் திறந்ததா?
- நிகழ்த்தல் எதை நிறைவேற்ற வேண்டும் என்று எதிர்பார்க்கப்படுகிறது?
- கண்ணுக்குப் புலப்படும் நிகழ்வுக்கு முன்பும் பின்னரும் என்ன நடக்கிறது?
ஒவ்வொரு நிகழ்த்தலின் முதன்மை நோக்கமும் பார்வையாளர்களை மகிழ்விப்பது என்று கருதாதீர்கள். அது ஒரு தெய்வம் அல்லது மூதாதையரைப் போற்றலாம்; வாழ்க்கைச் சுழற்சி நிகழ்வுடன் இணைந்திருக்கலாம்; பருவ மாற்றத்தைக் குறிக்கலாம்; ஒரு கடமையை நிறைவேற்றலாம்; ஒரு கதையைத் தலைமுறைகளுக்கு எடுத்துச் செல்லலாம்; கூட்டு நினைவுகளைத் தாங்கலாம்; சமூக விமர்சனத்திற்கு இடமளிக்கலாம்; அல்லது வருமானத்தை உருவாக்கலாம். ஒரே கலைவடிவம் வெவ்வேறு சூழல்களில் பல நோக்கங்களை நிறைவேற்றலாம்.
சமூக உறவுகளைப் புரிந்துகொள்ளுங்கள்
கலையைச் சாத்தியமாக்கும் பணியைச் செய்பவர்களை அடையாளம் காணுங்கள். இதில் நிகழ்த்துநர்கள், ஆசிரியர்கள், பக்கவாத்தியக் கலைஞர்கள், சடங்கு அதிகாரம் உடையவர்கள், ஒருங்கிணைப்பாளர்கள், கருவி மற்றும் ஆடை உருவாக்குநர்கள், பொருட்களின் உடைமையாளர்கள், ஆதரவாளர்கள், தொழில்நுட்பப் பணியாளர்கள், குடும்ப உறுப்பினர்கள், நிகழ்வை நடத்துபவர்கள் மற்றும் பார்வையாளர்கள் ஆகியோர் இடம்பெறலாம்.
பாத்திரங்கள் எவ்வாறு ஒதுக்கப்படுகின்றன, அவை திறன், வயது, பாலினம், குடும்பம், மரபுவழி, சமூக உறுப்பினர் நிலை, தொழில், சடங்கு பொறுப்பு அல்லது தனிப்பட்ட தேர்வு ஆகியவற்றைச் சார்ந்துள்ளனவா என்று கேளுங்கள். ஒவ்வொரு பாத்திரத்திற்கும் பயன்படுத்தப்படும் சொற்களைப் பதிவு செய்யுங்கள். நிகழ்த்தலில் குறைவாகக் கண்களுக்கு புலப்படுகிறார் என்பதற்காக ஒருவரை மரபுக்கு குறைவான முக்கியத்துவம் கொண்டவராகக் கருதாதீர்கள்.
அந்தக் கலை சமூகத்துக்குள் மற்றும் சமூகத்திற்கு வெளியே எவ்வாறு பார்க்கப்படுகிறது என்பதையும் கேளுங்கள். அது பெருமை, வாழ்வாதாரம், கடமை, பக்தி, களங்கம், அரசியல் வெளிப்பாடு அல்லது பொது அங்கீகாரம் ஆகியவற்றின் ஆதாரமாக இருக்கலாம். இப்பொருள்கள் ஒன்றோடொன்று இணைந்து இருக்கலாம். கலையின் சமூக நிலையை வெவ்வேறு பங்கேற்பாளர்கள் வேறு விதமாக விவரிக்கலாம்; அவரவர் கூறல்கள் யாருடையவை என்பது தெளிவாகக் குறிப்பிடப்பட வேண்டும்.
சடங்கு மற்றும் மரபுவழி உறவுகளைப் பின்தொடருங்கள்
கலை சடங்கு அல்லது மரபுவழி நடைமுறையுடன் தொடர்புடையதாக இருக்கும் இடங்களில், அதை விளக்க, நிகழ்த்த, பதிவு செய்ய மற்றும் பகிர யாருக்கு அதிகாரம் உள்ளது என்பதை அறியுங்கள். பொருத்தமான நேரங்கள், இடங்கள், முன்னேற்பாடுகள், படையல்கள், கட்டுப்பாடுகள் மற்றும் நடத்தை முறைகள் குறித்து கேளுங்கள். சில கூறுகள் பொதுவெளியில் கண்ணுக்குப் புலப்படலாம்; ஆனால் அவற்றின் பொருள் கட்டுப்படுத்தப்பட்டிருக்கலாம். ஒரு நிகழ்வைப் பதிவு செய்யக் கிடைத்த அனுமதி, அதைச் சுற்றி சேகரிக்கப்பட்ட ஒவ்வொரு விளக்கத்தையும் வெளியிடுவதற்கான அனுமதியைத் தானாக வழங்குவதில்லை.
ஒரு நடைமுறை கோயில் அல்லது புனிதத் தலத்திற்கு அருகில் நடைபெறுகிறது என்பதற்காக மட்டும் அதை “புனிதமானது” என்று விவரிக்காதீர்கள். அந்தத் தொடர்பை பங்கேற்பாளர்கள் எவ்வாறு புரிந்துகொள்கிறார்கள் என்று கேளுங்கள். அதேபோல், ஒரு சடங்கு நிகழ்த்தலுக்கு சமூக, கலை, பொருளாதார அல்லது அரசியல் முக்கியத்துவமும் இருக்கும் போது, அதை சமய நம்பிக்கையாக மட்டும் சுருக்காதீர்கள்.
பொருட்சார் உறவுகளை ஆவணப்படுத்துங்கள்
கருவிகள், ஆடைகள், முகமூடிகள், பொம்மைகள், துணைப்பொருட்கள் மற்றும் சடங்குப் பொருட்கள் கலைவடிவத்தின் பொருட்சார் வாழ்வின் பகுதிகளாகும். ஒவ்வொரு பொருளும் என்ன பெயரில் அழைக்கப்படுகிறது, அதை யார் உருவாக்குகிறார்கள் அல்லது வைத்திருக்கிறார்கள், யார் கையாளலாம், அது எவ்வாறு தயார்படுத்தப்படுகிறது, நிகழ்த்தலில் அது என்ன பங்கு வகிக்கிறது என்பவற்றைக் கேளுங்கள்.
பொருட்கள், அந்தக் கலையை காடுகள், வயல்கள், விலங்குகள், சந்தைகள், சிறப்பு கைவினைகள் மற்றும் பரிமாற்ற முறைகளுடன் இணைக்கலாம். மரம், தோல், நார், உலோகம், துணி, வண்ணப்பூச்சு அல்லது பிற மூலப்பொருட்களின் கிடைப்பிலும் விலையிலும் ஏற்படும் மாற்றங்கள், கலை எவ்வாறு ஒலிக்கிறது, தோன்றுகிறது அல்லது தொடர்ந்து வாழ்கிறது என்பதைப் பாதிக்கலாம். பழுதுபார்த்தல், மாற்றுப் பொருட்கள் பயன்படுத்துதல் மற்றும் புதிய தொழில்நுட்பங்கள், தழுவலையும் சிரமத்தையும் இரண்டையும் வெளிப்படுத்தலாம்.
ஒரு பொருள் ஏன் முக்கியம் என்பதை கலைவடிவப் பதிவு விளக்க வேண்டும்; ஆனால் விரிவான அளவீடுகள், கட்டுமானப் புகைப்படங்கள், கூறுகளின் விளக்கங்கள் மற்றும் முப்பரிமாணப் பதிவுகள் தனியான கருவி அல்லது பொருள் பதிவில் இடம்பெற வேண்டும். அந்தத் தகவல்களை எல்லாம் மீண்டும் எழுதுவதற்குப் பதிலாக அந்தப் பதிவை கலைவடிவத்துடன் இணையுங்கள் .
இடம் நடைமுறையை எவ்வாறு வடிவமைக்கிறது என்பதை அறியுங்கள்
நிகழ்த்தல் இடம், நிகழ்த்துநர்கள் எவ்வாறு நுழைகிறார்கள், பார்வையாளர்கள் எங்கு நிற்கிறார்கள், ஒலி எவ்வாறு பரவுகிறது, அசைவு எந்தத் திசையில் செல்கிறது, குறிப்பிட்ட எல்லைகளை யார் கடக்கலாம் என்பவற்றைத் தீர்மானிக்கலாம். அந்த இடம் மேடை, தெரு, வீடு, முற்றம், வயல், காடு, நீர்நிலை, கோயில் வளாகம் அல்லது ஊர்வலப் பாதையாக இருக்கலாம். அது நிரந்தரமானதாகவோ தற்காலிகமானதாகவோ, அல்லது அந்த நிகழ்வின் மூலமே உருவாகும் இடமாகவோ இருக்கலாம்.
கேளுங்கள்:
- இந்த இடம் என்ன பெயரில் அழைக்கப்படுகிறது?
- நிகழ்த்தல் ஏன் இங்கே நடைபெறுகிறது?
- இந்த இடத்தை யார் கட்டுப்படுத்துகிறார்கள், பராமரிக்கிறார்கள் அல்லது அணுக அனுமதி வழங்குகிறார்கள்?
- நிகழ்த்துநர்கள், பங்கேற்பாளர்கள் மற்றும் பார்வையாளர்கள் எவ்வாறு அமைக்கப்படுகிறார்கள்?
- பருவம், வானிலை அல்லது நாளின் நேரத்தைப் பொறுத்து இந்த இடம் மாறுகிறதா?
- இதே கலை வேறு இடத்தில் நிகழ்த்தப்பட முடியுமா? அப்படியானால் எது மாறும்?
- வளர்ச்சித் திட்டங்கள், இடம்பெயர்வு, சுற்றுச்சூழல் மாற்றம் அல்லது ஒழுங்குமுறை காரணமாக இந்த இடத்தை அணுகும் வாய்ப்பு மாறியுள்ளதா?
கட்டுப்படுத்தப்பட்ட அல்லது பாதிப்புக்கு உள்ளாகக்கூடிய இடங்களின் துல்லியமான அமைவிடத்தை ஒப்புதல் இன்றி வெளியிடாதீர்கள். விரிவான இடவியல் விளக்கமும் வரைபடமிடலும் பொருத்தமான அணுகல் நிபந்தனைகளுடன் தொடர்புடைய தனியான இடப் பதிவில் பராமரிக்கப்பட வேண்டும்.
கலைக்குத் தேவையான பொருட்களும் பொருளாதார ஆதரவும் எவ்வாறு தொடர்ந்து கிடைக்கின்றன என்று கேளுங்கள்
நிகழ்த்தல்களுக்கு நேரம், உழைப்பு மற்றும் வளங்கள் தேவை. பயணம், ஒத்திகை, கருவிகள், ஆடைகள், உணவு, இடம், ஒலி அமைப்புகள் மற்றும் கட்டணம் ஆகியவற்றின் செலவுகளை யார் ஏற்கிறார்கள் என்று கேளுங்கள். குடும்பங்கள், சமூகப் பங்களிப்புகள், ஆதரவாளர்கள், கோயில்கள், உள்ளூர் அமைப்புகள், அரசு துறைகள், பள்ளிகள், விழாக்கள், பண்பாட்டுச் சந்தைகள், எண்ணிமத் தளங்கள் அல்லது தனிநபர்களின் தியாகங்கள் ஆகியவற்றிலிருந்து ஆதரவு வருகிறதா என்பதை அறியுங்கள்.
நடைமுறைப்படுத்துபவர்கள் வழக்கமான, பருவகால அல்லது அவ்வப்போது கிடைக்கும் வருமானத்தைப் பெறுகிறார்களா, மேலும் அவர்கள் வேறு என்ன வேலை செய்கிறார்கள் என்பதையும் கேளுங்கள். ஊதியம் பெறும் நிகழ்த்தல் ஒரு கலை குறைவாக “உண்மையானது” ஆகிவிட்டதற்கான சான்று என்றும், ஊதியம் இல்லாத நிகழ்த்தல் பொருளாதார வாழ்க்கைக்கு வெளியே உள்ளது என்றும் கருதாதீர்கள். கட்டணம் கிடைப்பதும் கிடைக்காததும் யார் தொடர்ந்து நடைமுறைப்படுத்த முடிகிறது என்பதை வடிவமைக்கின்றன.
ஆதரவு முறைகளில் ஏற்படும் மாற்றங்கள் நிகழ்த்தலின் காலநீளம், பாடல்/நிகழ்த்தல் தொகுப்பு, உடை, பார்வையாளர்கள் மற்றும் நிகழ்வை ஒருங்கிணைக்கும் அதிகாரத்தை மாற்றக்கூடும். நிறுவன ஆதரவு, சுற்றுலா அல்லது வணிக நிகழ்த்தல் தானாகவே நன்மையானது அல்லது தானாகவே தீமையானது என்று விவரிப்பதற்குப் பதிலாக, இம்மாற்றங்களை நடைமுறைப்படுத்துபவர்கள் எவ்வாறு புரிந்துகொள்கிறார்கள் என்பதை ஆவணப்படுத்துங்கள்.
அரசியல் மற்றும் நிறுவனச் சூழல்களைக் கவனியுங்கள்
அரசு வகைப்பாடுகள், பண்பாட்டு விழாக்கள், பள்ளிகள், சமய நிறுவனங்கள், ஊடக அமைப்புகள், சுற்றுலா மற்றும் மரபுத் திட்டங்கள் ஒரு கலை எவ்வாறு பெயரிடப்படுகிறது, முன்வைக்கப்படுகிறது, மதிப்பிடப்படுகிறது என்பவற்றை பாதிக்கலாம். அவை வாய்ப்புகளை உருவாக்கலாம்; அதேவேளை நிகழ்த்தல்களைச் சுருக்கவும், குறிப்பிட்ட வடிவங்களைத் தேர்ந்தெடுக்கவும், சில நடைமுறைப்படுத்துபவர்களை விலக்கவும், அல்லது கலையை அதன் சமூகச் சூழலிலிருந்து பிரிக்கவும் கூடும்.
இத்தகைய சூழல்களில் கலை எவ்வாறு பிரதிநிதித்துவப்படுத்தப்படுகிறது என்பதை யார் தீர்மானிக்கிறார்கள் என்று கேளுங்கள். நடைமுறைப்படுத்துபவர்களுக்கு புதிய பெயர்கள் வழங்கப்பட்டுள்ளனவா, வேறு வகைப்பாட்டுக்குள் சேர்க்கப்பட்டுள்ளனவா, அல்லது கலைவடிவத்தை மாற்றுமாறு கேட்டுக்கொள்ளப்பட்டுள்ளதா? அங்கீகாரமும் கட்டணமும் யாருக்கு கிடைக்கின்றன? சமூகத்தின் பெயர்களும் பங்களிப்புகளும் அங்கீகரிக்கப்படுகின்றனவா? கலை பொதுவெளியில் அதிகம் தெரியவருவது, பதிவுகள், கதைகள், வடிவமைப்புகள் அல்லது நிகழ்த்தல் பொருட்கள் மீதான கட்டுப்பாட்டை பாதித்துள்ளதா?
ஒவ்வொரு பதிவுக்கும் ஒரு பொதுவான அரசியல் பகுப்பாய்வைச் சேர்ப்பது நோக்கம் அல்ல. வெளிப்புற முடிவுகள் கலையின் நடைமுறை, பொருள், உரிமை, அணுகல் அல்லது தொடர்ச்சியை நேரடியாகப் பாதிக்கும் போது அவற்றை ஆவணப்படுத்துவதே நோக்கம்.
ஐந்து உறவுகளையும் பின்தொடருங்கள்
இந்த ஆவணப்படுத்தல் மாதிரி கலைவடிவத்தை மற்ற நான்கு வழித்தடங்களுடன் இணைக்கிறது: கலைஞர், நிகழ்த்தல், கருவி மற்றும் இடம். இத்தொடர்புகளை நடைமுறையில் பின்தொடர ஒரு எளிய வழி, ஆவணப்படுத்தப்பட்ட ஒரு நிகழ்த்தலிலிருந்து தொடங்கி பின்வருமாறு கேட்பதாகும்:
- எந்த கலைவடிவம் அல்லது கலைவடிவங்கள் நடைமுறைப்படுத்தப்பட்டன?
- எந்தக் கலைஞர்களும் பிற அறிவுத் தாங்குபவர்களும் அந்த நிகழ்வைச் சாத்தியமாக்கினர்?
- எந்த கருவிகள், ஆடைகள், துணைப்பொருட்கள் மற்றும் பிற பொருட்கள் பயன்படுத்தப்பட்டன?
- எந்த இடங்களும் பாதைகளும் அந்த நிகழ்வுக்கு அதன் சூழலையும் பொருளையும் வழங்கின?
- இந்த மரபை இன்னும் முழுமையாகப் புரிந்துகொள்ள வேறு எந்த நிகழ்த்தல்கள், மக்கள், பொருட்கள் மற்றும் இடங்களை ஆவணப்படுத்த வேண்டும்?
விரிவான தகவல்கள் எங்கு இடம்பெற வேண்டுமோ அங்கு தனித்தனி பதிவுகளை உருவாக்கி, அவற்றை கலைவடிவத்துடன் இணையுங்கள். ஒரு கலைஞரின் வாழ்க்கை வரலாறு கலைஞர் சுயவிவரத்தில் இடம்பெற வேண்டும். ஒரு குறிப்பிட்ட நிகழ்வின் வரிசையும் சூழ்நிலைகளும் நிகழ்த்தல் பதிவில் இடம்பெற வேண்டும். அளவீடுகளும் கட்டுமான விவரங்களும் கருவிப் பதிவில் இடம்பெற வேண்டும். அணுகல், திசையமைப்பு மற்றும் இடவியல் வரலாறு இடப் பதிவில் இடம்பெற வேண்டும். இத்தொடர்புகளை எல்லாம் ஒரே அதிகச்சுமை கொண்ட விளக்கமாகக் கலந்து விடாமல், அவை ஒன்றோடொன்று எவ்வாறு இணைகின்றன என்பதை கலைவடிவப் பதிவு வெளிப்படுத்த வேண்டும்.
என்ன நிகழ்த்தப்படுகிறது என்பதோடு மட்டுமல்லாமல், அந்தக் கலை வாழ்வதற்குக் காரணமான மக்கள், நோக்கங்கள், பொருட்கள், இடங்கள் மற்றும் சூழ்நிலைகளின் வலையமைப்பையும் வாசகர்கள் காணும்போதுதான் ஒரு கலை புரிந்துகொள்ளக் கூடியதாகிறது.